Ihre Browserversion ist veraltet. Wir empfehlen, Ihren Browser auf die neueste Version zu aktualisieren.
Laudatio auf den Keerlke-Preisträger Garrelt van Borssum (1999)

 

Streektaaldag in Nörden, 6.11.1999
Laudatio van Dirk Gerdes

Keerlke-Pries an Garrelt van Borssum 

 

Geachte Damen un Heren, leve Frünnen!

 

De oostfreeske Oscar, uns Keerlke-Pries, is weer to vergeven. Elk un een wacht nu, dat de Naam up d’ Tafel kummt. Ik mutt daarför sörgen, dat Ji vördeem noch ‘n bietje tohört, daarum segg ik de Naam noch nich. 

In Oostfreesland gifft dat, buten de Uttekens van de Oostfreeske Landskupp, noch twee groot Kulturpriesen, de hier för de Minsken blot ut Oostfreesland stift worden sünd: de „Keerlke“ un de Hans-Beutz-Stiftungspries, de güstern an Hans-Jürgen Tabel van de Ländliche Akademie Krummhörn vergeven worden is. Glückwunsk nochmaal van disse Stee an Hans-Jürgen Tabel: he hett völ för uns Streektaal un de Minsken in Oostfreesland daan.

De Priesdrager van güstern un de Priesdrager van vandaag hebben mi to ‘t Naden­ken brocht:

Beid’ sünd Lü, de de Saak över hör Person stellt un de in d’Achtergrund blievt, wenn de Presse an ‘t Fotograferen is. Se sünd Teamarbeiders in en Kuntrei, waar besün­ner Lü mit besünner Ideen allennig upsmeten sünd un blot as Privatünnernehmers wiederkoomt of sük dörsetten köönt. Wat sünd de Lü bit in de höchste Instanzen över de Ingenieur Aloys Wobben hertrucken, as ENERCON noch ‘n lütten Warkstee weer!

De Teamarbeiders hört de Tokummst - dat weet wi all, un dat kann een överall lesen.

Man wenn ik mi so de Priesdragers in Oostfreesland ankiek, denn bewunner ik im­mer weer de Gedür, de lang Aam, van disse Minsken! Ik fraag mi denn, of dat in Oostfreesland nich to lang dürt, bit dat en besünner Minske maal de Anerkennen kriggt, de hüm as Person tosteiht.

Wi hebben - so meen ik - kien politischen Kultur, de jung Lü Mood maakt, wat Be­sünners to wagen: Wovöl jung Lü gaht van Oostfreesland weg un koomt nich weer torügg, umdat hier noch to faken de Sprök ut de fievtiger Jahren gellen deiht: „Keine Experimente“? Un to disse Kultur hört de Instellen: „Blot nich upfallen!

Oostfreesen sünd good Teamarbeiders! Daar kunnen wi wied mit komen, wenn wi disse Begabung koppeln deen mit Neeisgier un Anerkennen för enkelde be­sünner Lü.

De Keerlke-Pries un ok de Hans-Beutz-Stiftungspries haalt sükse besünner Lü an ‘t Lucht. Upmaal sücht ‘n denn Biller in d’ Zeitung van Minsken, de daar nich elke Dag to sehn sünd.

De Priesen willt Mood maken, sükse Lü fakerder na vörn to halen, sükse Lü mehr to stönen.

Un wenn daarför anner Lü nich so faken in d’ Zeitung staht, denn kunn’n villicht en Geföhl daarför kriegen, dat Oostfreesland in Wahrheid en heel lebennigen Region is!

Wo anners lett sük dat verklaren, wenn bi de Wettstried „Ideen aus der Region für die Region“, de en Ollenbörger Bank in ganz Weser-Ems dörföhrt hett, ut Oostfreesland haast sovöl Ideen instürt worden sünd as ut all anner Kuntreien to­samen?

Vör sovöl Kreativität un Interess moot wi doch nich bang wesen! Daar moot doch nich de Deckel up! Waarum hett en Bank ut Ollenbörg un nich de Strukturkonferenz Ostfreesland so’n Wettstried dörföhrt?

Laat uns vandaag een na vörn halen, de dit Jahr sien 50. Geburtsdag fiert hett un anto 20 Jahr an mennig Steden för Plattdütsk un uns Regionalkultur warkt hett:

De al in de 80er Jahren een van de wichtigste Mitarbeiders in de Modellversök „MOBiLe“ („Museen Ostfrieslands als Bildungsstätten und Lernorte“) west is. De in dat Pilotprojekt „Plattdütsk in de School“ mit daarför sörgt hett, dat dat Schipp unner dat Leid van en anner Mester (de sük vandaag daarmit mooimaakt) nich up de Grund leep, ok wenn dat haast sien Gesundheid köst harr.

Een, de in sien Bibliothek un in sien Kopp (!) woll jede Book hett, dat in de lesde twintig Jahr un mehr in Oostfreesland un över Oostfreesland rutkomen is. De de Mesterkring in Oostfreesland an ‘t Lopen hollt. De bi Oostfreeske Taal ok noch in de Vörstand mitwarkt hett. De nu siet ‘n paar Maanten de eerste Fackberader för Platt­dütsk in d’ School bi de Bezirksregeren is. De ut Leer kummt un


Garrelt van Borssum

heet. De kriggt de Keerlke 1999.

Besten Dank för ‘t Tohören.